قرأت لكم :)

تدوينة راااائعة لجو غانم ... بدل فاقد

بالمناسبة ... مدونة جو من أروع المدونات التي تابعت
قد أسمح لنفسي أن تطالبكم بمتابعتها


و تدوينة أخرى حول أحداث غزة الأخيرة ... للأخ أحمد نصر
جرس إنذار لدول الجوار


دمتم بود

استراتيجية

- شفت وليد بيك جنبلاط ؟

- مين وليد بيك ؟

- ييي ! وليد بيك !!

- إيه سمعت الإسم ... قصدك أي واحد منن ؟؟

- واحد من مين ؟؟؟

- يعني ،،، هل انت بتقصد وليد بيك جنبلاط الاقطاعي و لا الاشتراكي ؟
وليد بيك اللي المقاومة هي التاريخ و الحاضر و المستقبل ولا المقاومة بدعة و سلاحها غدار ؟
وليد بيك العروبة و فلسطين و الوحدة الإسلامية ولا وليد بيك أنا بشتغل لمصلحة الطايفة الدرزية ؟
وليد بيك الانفتاح و التحاور ولا وليد بيك الانعزال و القوقعة ؟
وليد بيك العيش المشترك و المصالحة الوطنية ولا وليد بيك " هم غزوا و نحن غزونا و الأبرياء يدفعون الثمن" ؟؟؟

بدك تكون دقيق و تحدد لجاوبك

- اووووووف ... ايه الله يعين هالشعب

- أي شعب ؟

- الشعب اللبناني

- أي منن ؟

- شو منن ... الشعب اللبناني

- لا بدك تكون دقيق
الشعب اللي صقف لوليد بيك و هو عروبي و هو امريكي ؟ و لا الشعب اللي مشي وراه لما قال بدنا نحرر فلسطين ؟ ولا الشعب اللي مشي وراه لما قال لبنان اولا ؟ ولا الشعب اللي حمل السلاح و قاتل الشيعة و راحلن قتلى كتير ؟ و لا الشعب اللي لما وليد بيك صالح الشيعة صقفوله و نسيوا قتلاهن ؟

أي شعب ؟

حزورة تانية

- لك يا زلمة

- شو ؟

- كل ما شوف عجقة السيارات بفكر انو ما في أزمة بنزين بالبلد ،،، ولا انو حق تنكة البنزين وصلت لل 22 دولار و الناس ساكتة

- ....

- و كل ما شوف هالمطاعم مليانة ناس بفتكر انو ما في فقر بالبلد و لا انو حق ربطة الخبز في ناس ما بتلحقه !

- ....

- و كل ما اروح ع منطقة سياحية ... بفتكر حالي طلعت بره لبنان ! ما بسمع الا رطن اجنبي او دمتلنا يا طويل العمر !
دخلك وين بروحوا اللبنانيين بالموسم السياحي ؟؟؟

علمانيتنا

- نحنا عايشين ببلد ديمقراطي علماني

-

- شوف أحزابنا ... كلها أحزاب تقوم عالديمقراطية ... أحزاب علمانية

- متل ؟

- تيار المستقبل !

- الممثل الرسمي للطائفة السنية و اللي 99.999 % من أعضاؤه بس من الطائفة السنية ؟

- اها

- يمكن

- و حركة أمل كمان !

- اللي هي بتعتبر حالها متحدث باسم الطائفة الشيعية و اللي 99.999 % من أعضاءها شيعة ؟

- إيه

- يمكن

- و الحزب التقدمي الإشتراكي

- اللي زعيمه وليد " بيك " جنبلاط ؟

- شو بو وليد بيك ؟

- ولا شي

- بدي أعرف

- وليد بيك "الإقطاعي " رئيس حزب إشتراكي ؟؟

- هلأ أنا ما خصني ... علماني ولا مش علماني ؟

- الحزب التقدمي ؟

- إييييييييه !

- اللي هو الممثل الأوحد للطايفة الدرزية ... و كل أعضاؤه دروز

- إيه هوي

- علماني حبيبي ... كلن علمانيين و ما في ولا واحد طائفي فيهن !

- شفت ؟

- بس انا كمان استنتجت شغلة تانية

- شو ؟

- ان الشعب اللبناني كتير كتير كتير واعي

حزورة

بـ أديه طلع نبيه بري رئيس برلمان ؟

- قتيل و 7 جرحى

و بـ أديه طلع سعد الحديري رئيس حكومة ؟

- قتيلين و ما بعرف كم جريح

شو بدك يا عمي ... الناس مقامات

لا و انت الصادق ... الناس " مداسات "

الدكتور يكن

رجل الدكتور يكن عن دنيانا في 13 حزيران من هذا العام

عم بتذكره كتير هاليومين ... مش بس لأني عم بقراله واحد من أروع كتبه

عم بتذكره كرمال كان بالنسبة الي قنديل ضو بهالعتم

الدني مخربطة كتير يا جماعة الخير

محتاجين حدا متل هالزلمة

واحد مش امّـعة ... مش طائفي بس بيعرف الله و بيقدر يخلينا نعرفه نحنا كمان

واحد مش مبيوع ضميره لدولارات " طويل العمر "

و ما بطلع فتوى انو الحمصي زلمة ادمي لانو اتعامل مع إسرائيل ضد الشيعة

هيدا زلمة بيعرف شو يعني تعايش و وحدة وطنية عنجد مش تبعيت قناة " المستهبل " و اتباعها

الموت عم يخطف الأوادم

كل واحد يخاف ع حاله

:)

إنا لله و إنا إليه راجعون

لله ما أعطى و له ما أخذ و كل شيء عنده بمقدار

البقاء لله

انت الغلطان يا سيد

نعم ،،، أنت المخطئ يا سيد !

إعتقدتَ و جعلتنا نعتقد من خلفك أن في هذا الوطن ما يستحق الحياة !

لماذا أرسلت ابنك للحرب ؟!

لماذا استشهد هادي ؟

ألنرى نايلة و سامي و نديم تحت قبة " البغلمان " ؟

أم لنعيش خمسة عشرة عاما أخرى من حرب " الآخرين " على أرضنا ؟

لماذا مات هادي ؟

ألأنه رأى في إسرائيل عدوا محتلا لأرضنا ؟

هراء يا سيد ... هراء

ألم تسمع البطريرك ؟

البطرك خاف على على عروبة لبنان ( للمرة الأولى يعترف البطريرك بعروبة لبنان ! - انجاز لا تنكره يا سيد ! ) من فوزكم بالانتخابات

لأنكم و " بكل جرأة " نقولها ... أنتم الفرس أشد عداوة لنا من اليهود !

الفرس و الشيعة و لربما " علي أكبر عوني " هم الأعداء

لم أوهمتنا و أوهمت هادي أن إسرائيل قد تكون يوما عدوا ؟!

أنهون و يهون جسد طفلك عليك ؟؟

لمَ يا سيد ؟

لمَ أوهمتنا أن في هذا البلد شيء يستحق أن نموت من أجله ؟

لمَ أوهمتنا ووعدتنا بحلم دولة ، قد تنشأ دولة فلسطينية و تزدهر و لن تنشأ هذه المزعومة الملعونة ؟

لمَ اعتقدت أن معادلة الكمية و النوعية التي أثارها المغدور جبران التويني ليس لها مكان بيننا ؟

أنظر معي ... ألم تحز المعارضة على غالبية الأصوات ؟

رغم ذلك خسرتم

أتعلم لماذا ؟

لأن ناخبيكم من جنس أدنى من ناخبي 14 آذار

نعم يا سيد

فناخبيكم لا يمانعون النوم في الطرقات لأشهر

ولا يمانعون احراق دولاب هنا و اقفال طريق هناك كرمال الكهربا

لا يمانعون استقبال رصاص بني صهيون بصدورهم العارية !

بينما الطرف الثاني ... " كلاس "

عوض الرصاص يستقبلون كونداليزا و يقبلونها

أترى لأي درجة يضحون ؟!

أتعلم لمَ ؟

أنت يا سيد " محبّـكها "

جهاد و وطن و دقن و قصص ... يا زلمة طنش

هم يحبون الحياة ... بالطول بالعرض يحبون الحياة

باحتلال بسلم بليبرمان بمبارك بحبوا الحياة !

لماذا منعت هادي من أن يحب الحياة معهم ؟!

ما بيلبقله ؟

ألا يستحق أن يتخرج من كلية الحقوق مثلا كسامي الجميل ؟

أو أن يكون غنوجا نعنوعا كنديم الجميل ؟

طب و الله هادي طيوب و حبوب و بيستاهل كل خير

دخلك ... و بشو نايلة أحسن منه ؟

نايلة التويني يا سيد جدها طـلّـع خط سياسي جديد ... و هالخط ضد التوريث السياسي

بس لما اتفركش ع هالخط ... اضطر يجيب ابنه يساعده

بس كرمال ما حدا غير جبران بيقدر يكمل

و لما جبران انقتل يا سيد ... اضطرت هالعيلة المكلومة تحط نايلة " بنته " محله ... رغم انو نايلة ضد التوريث يا سيد

بس بتعرف كرمال هالخط ما يروح للغريب

شو يا سيد ؟

ما كنت ناوي تحط هادي محلك بالأمانة العامة - بعد عمر طويل الله يخليلنا ياك ؟

الله يباركلنا بعمرك ... ما بتخيل هالبلد لحظة بلاك ...

بتعرف ليش منحبك ؟

مش لأنك أم الصبي

هالصبي اللي صلبوه و مشيوا بجنازته و دفنوه

و عند كل استحقاق بينبشوا القبر و بطلعوه

و بيسبوك ... ما بعرف ليه

بيقولوا انك و انت حاضنه لهالصبي خنقته و ما تركتله مجال يتنفس

قولك ؟!

مشكلتك ان ما بترد ... و اذا رديت بتكون كتير مهذب

:)

مشكلة انك تكون صاحب مبدأ بهالبلد

و ما منحبك بس كرمال إنك لما بتحكي ما بتاخدنا ع قد عقلنا ... و ما بتكذب أكيد

يا ريتك بتكذب

يا ريتك بتعرف تكذب

لو بتعرف ما كنت قلت 7 أيار يوم مجيد

كنت قلت يوم تعيس يوم كئيب يوم أبشع من نايلة معوض و هي عم تتهاضم

كنت قلت انك كنت غلطان بـ 7 أيار

و انو رئيس الموساد لما طلع و قال انك ضيعتله جهد مخابراتي صهيوني عمره 3 سنين ببيروت اللي نحنا و انت منحبا، يمكن كان عم بجاملك

زي ما أولمرت جامل فؤاد أبو دمعة وقت حرب تموز

يمكن يا سيد ... ما بعرف

نحنا منحبك يا سيد لأنك لما نسمعك بتفهّمنا شو عم بصير بالدني

الا هالمرة ما ظبطت معك يا سيد

كنت مفكر انو هالانتخابات رح تكون غير شكل

و يمكن من بعدا نقدر سوا نعمر بلد

بس شو اللي صار يا سيد ؟

ليه فجأة فقنا لقينا أحمد فتفت - واحد شاي - و هادي حبيش و سامي و نديم و نايلة بالبرلمان ؟

شو اللي صار و جاب الشيخ سكسوكة رئيس حكومة ؟

عبال ماآآآآآآآآآآآآآ يشكل الحكومة ايه بتكون خلصت ولاية الرئيس !

وين كان الغلط ؟

ليش هالبلد محكوم عليه انو ينحكم بالإقطاع ؟

ليه يا سيد ؟

ما قدرتوا واجهتوا مال آل سعود ؟

و مين بيقدر ؟!

ما قدرتوا تواجهوا حرب سياسية كونية ؟

و مين بيقدر ؟!

ما قدرتوا تخلصوا العالم من فكرة المد الشيعي ؟

و بوج الطائفية مين بيقدر يهدّي ؟

يا سيد ... أنت عظيم

عظيم بالسياسة ... بس أعظم بالحرب

أنت أكبر من إنك تفوت بتفاصيل سياسية بهالبلد

أكبر من إنك تفوت بحوار مع شلة نصابين حرامية و كذابين

كيف الن عين يقعدوا معك ؟

انت كيف بتستقبلن ؟

رح تقوللي هالبلد ما بينبنى الا عالتوازات الطائفية ؟؟

هيدي نتيجة الانتخابات يا سيد ... ما فينا نعمل شي

سبحانو الله هيدي ارادته

بس كمان الله ما قالنا نكمل بالغلط

يا سيد اتركن ... لتركن يتحاوروا و يتناقروا زي لطفية و سعاد

انت أكبر من انك تتناقر معن

او تقعد معن

انت يا سيد ... خليك مع هادي

و الف الف متل هادي

كلن بالجنوب ناطرينك

خليك حارب اسرائيل يا سيد

و اتركنا نحنا نحاول نقنع اهلنا انو العدو كان و لا زال اسرائيل

مش ... انتَ العدو يا سيد